Këtë të hënë është nënshkruar një marrëveshje granti me vlerë prej 9 milionë franga (9.6 milionë euro), për financimin e fazës së dytë të projektit “Menaxhimi i Integruar i Burimeve Ujore në Kosovë”, raporton Gazeta “Enigma”.
Ministri i Financave, Punës dhe Transfereve Hekuran Murati, dhe ambasadori i Zvicrës në Kosovë Jürg Sprecher nënshkruan këtë marrëveshje.
Përmes njoftimit ata kanë deklaruar se ky program vlerën totale e ka prej rreth 20 milionë frangash zvicerane (21.3 milionë euro), do të zbatohet në tri faza.
Aty tutje thuhet se faza e parë ka pasur një financim prej 8.6 milionë franga (9.1 milionë euro), ndërsa ky grant i ri, i ofruar nga Departamenti Federal i Punëve të Jashtme të Zvicrës përmes Agjencisë Zvicerane për Zhvillim dhe Bashkëpunim (SDC), do të mbështesë fazën e dytë të projektit.
“Ky projekt ka për qëllim mbrojtjen dhe menaxhimin efikas të burimeve ujore, përmirësimin e infrastrukturës ujore, reduktimin e ndotjes së ujërave dhe rritjen e efikasitetit të përdorimit të ujit në Kosovë”, shkruan në komunikatën e ministrisë./Gazeta Enigma/
