Shefi i EULEX-it, Lars-Gunnar Wigemark, ka folur lidhur me sigurinë në veri të vendit, duke thënë se kishte një bashkërendim të ngushtë ndërmjet tre ofruesve të sigurisë në Kosovë: Policisë së Kosovës, KFOR-it dhe EULEX-it
Wigermark në një postim në rrjetin social në Twitter ka thënë se bashkërendimi i ngushtë ndërmjet tre ofruesve të sigurisë në Kosovë, Policisë së Kosovës, KFOR-it dhe EULEX-it gjatë krizës së fundit në pjesën veriore të Kosovës është një shembull tipik i bashkëpunimit efektiv civil dhe ushtarak.
“Bashkërendimi i ngushtë ndërmjet tre ofruesve të sigurisë në Kosovë: Policisë së Kosovës, KFOR-it dhe EULEX-it gjatë krizës së fundit në pjesën veriore të Kosovës është një shembull tipik i bashkëpunimit efektiv civil dhe ushtarak për menaxhimin paqësor të një konflikti shpërthyes”, ka shkruar ai në Twitter.
Ndryshe, për 20 ditë me radhë, në dhjetor të vitit 2022, në katër komunat veriore të banuara me shumicë serbe, u vendosën barrikada në rrugët që çojnë drejt pikave kufitare Kosovë-Serbi.
Barrikadat u vendosën në shenjë pakënaqësie me arrestimin e një ish-polici serb të Kosovës, i cili, sipas autoriteteve të Kosovës, dyshohet për organizimin e një sulmi ndaj zyrave të Komisionit Qendror të Zgjedhjeve në veri.
Por, serbët vendosën të heqin barrikadat pasi Dejan Pantiqit iu ndryshua masa e sigurisë nga paraburgim në arrest shtëpiak.
Po ashtu, përfaqësuesit e serbëve në Kosovë, gjatë një takimi në Rashkë të Serbisë me presidentin serb, Aleksandar Vuçiq, më 28 dhjetor deklaruan se kanë marrë garanci që kërkesat e serbëve për heqjen e barrikadave do të plotësoheshin.
