Në fillim të javës ishte raportuar nga mediumi danez Ekstra Bladet se marrëveshja për dhënien me qera të 300 qelive mes Kosovës dhe Danimarkës mes është pezulluar.
Kjo si shkak i vështirësive financiare për realizmin e kësaj marrëveshje.
Por, kjo demantohet nga Ministria daneze e Drejtësisë.
Në në përgjigje me shkrim për Klankosova.tv u tha se kjo ishte veçse një keqkuptim.
“Danimarka nuk e ka ndërprerë, nuk e ka rikthyer apo pezulluar marrëveshjen e burgjeve ndërmjet Kosovës dhe Danimarkës. Çdo raportim në media që sugjeron të kundërtën bazohet në një keqkuptim. Marrëveshja është miratuar me votat e shumicës së deputetëve në Parlamentin danez në fillim të këtij viti dhe bashkëpunimi me Kosovën për planifikimin dhe realizmin e projektit vazhdon” – thuhet në përgjigjen e Ministrisë së Drejtësisë së Danimarkës për Klankosova.tv
Ministrja e Drejtësisë Albulena Haxhiu, pati deklaruar se nuk është anuluar marrëveshja me Danimarkën për marrjen me qera të burgjeve në Kosovë.
Ajo është shprehur se delegacionet Kosovë-Danimarkë janë në koordinim të plotë.
Tutje, Haxhiu ka thënë se një delegacion i Danimarkës do të vijë në Kosovë në tetor për të implementuar marrëveshjen.
Marrëveshja kishte vlerën e 200 milionë eurove që Danimarka do të duhej t’i paguante Kosovës për 10 vjetët e ardhshme.
Sipas marrëveshjes Danimarka, do t’i merrte me qera 300 qeli ku do të silleshin të burgosurit e dënuar me deportim.
Kjo ishte nënshkruar vitin e kaluar nga ministrja e Drejtësisë Albulena Haxhiu dhe Nick Haekkerup, tani ish-ministër.
