Zyra e Rregullatorit për Energji u ka bërë thirrje bizneseve që i plotësojnë kriteret për të dalë në treg të hapur, e që nuk kanë nënshkruar kontrata komerciale ende, të lidhin kontratat sa më shpejt me një furnizues të licencuar. Ndryshe, ka shtuar ZRRE, do të vazhdojë ndërprerja e furnizimit me energji elektrike për to.
ZRRE-ja ka lëshuar një komunikatë në të cilën ka thënë se procesi i liberalizimit të tregut të energjisë elektrike është detyrim ligjor, i përcaktuar më 2016. Siç ka thënë ZRRE, procesi i liberalizimit të tregut energjetik ka nisur më 2017 por se procesi ka pësuar vonesa më pas për shkak të disa rrethanave.
“Megjithatë, zbatimi i mëtutjeshëm i procesit të liberalizimit të tregut të energjisë për shkak të rrethanave të jashtëzakonshme ka pasur vonesa, si pasojë e pandemisë COVID-19 dhe krizës energjetike ndërkombëtare. Pas kësaj, ZRrE ka vendosur që nga data 1 Qershor 2025 të vazhdoj zbatimin e liberalizimit të tregut të energjisë elektrike, si detyrim ligjor dhe në të mirë të konsumatorëve fundor. Duhet theksuar se liberalizimi i tregut të energjisë elektrike është i rëndësishëm jo vetëm për përafrimin me Direktivat Evropiane, por edhe sepse krijon konkurrencë në një treg që deri më tani ka funksionuar si monopol”, thuhet në komunikatë.
ZRRE tutje ka thënë se ka të licencuar 23 kompani për aktivitetin e furnizimit me energji elektrike, prej të cilave 7 furnizues janë aktivë, të cilët kanë nënshkruar kontrata me konsumatorët.
“Sqarojmë opinionin publik se 9,963 pika matëse të ndërmarrjeve ekonomike i plotësojnë kriteret ligjore për të dalur në tregun e hapur të energjisë elektrike, ku prej tyre: · 9,212 pika matëse (92%) janë duke u furnizuar me kontrata komerciale; · 751 pika matëse (8%) ende janë pa furnizues”.
Bizneset që nuk kishin lidhur kontrata me furnizues deri më 1 qershor, u ishte mundësuar që të furnizoheshin edhe për 60 ditë të tjera nga KEK-u si Furnizues i Mundësisë së Fundit.
Oda Ekonomike e Kosovës ka dorëzuar padi më 19 gusht ndaj Zyrës së Rregullatorit të Energjisë, në Gjykatën Supreme për çështjen e daljes së bizneseve në treg të lirë të energjisë. Të shtunën nisi shkyçja e bizneseve që nuk kanë nënshkruar kontrata për furnizim me energji.
LEXO EDHE:
