Analisti politik Nexhmedin Spahiu ka kritikuar ashpër kryeministrin e Kosovës Albin Kurti lidhur me procesin e ndryshimit të emrave të rrugëve dhe shesheve në pjesën veriore të Mitrovicës.
Sipas Spahiut, ai kishte propozuar vite më parë që emrat e disa rrugëve dhe shesheve me konotacion agresiv të zëvendësoheshin me emra më të moderuar, me qëllim të krijimit të një atmosfere më përfshirëse dhe më të pranueshme për të gjitha komunitetet që jetojnë në veri të vendit.
Megjithatë, ai vlerëson se procesi është menaxhuar nga persona të papërgatitur dhe se rezultati ka qenë i dobët. Spahiu argumenton se është e pakuptimtë që në dy komunat e të njëjtit qytet, Mitrovicës së Jugut dhe Mitrovicës së Veriut, të përsëriten emra të njëjtë rrugësh, siç është rasti me rrugën “Isa Boletini”.
Ai gjithashtu kritikon përzgjedhjen e disa emrave të rinj, duke pretenduar se në vend të emrave me ngarkesë nacionaliste serbe janë vendosur emra që, sipas tij, nuk kontribuojnë në frymën e moderimit dhe bashkëjetesës.
Një tjetër vërejtje e Spahiut lidhet me mungesën e përfaqësimit të komunitetit boshnjak në emërtimet e reja. Ai thekson se në Mitrovicë jetojnë mijëra boshnjakë dhe ekziston edhe Mahalla e Boshnjakëve, por sipas tij asnjë rrugë nuk mban emrin e ndonjë personaliteti të njohur boshnjak.
Në fund, Spahiu ka ngritur shqetësime edhe për mënyrën e shkrimit të disa emrave në gjuhën serbe, duke përmendur rastin e ish-kryeministrit serb Zoran Đinđić, emri i të cilit, sipas tij, është shkruar gabimisht në tabelat e reja.
“Turp për mënyrën se si është zhvilluar ky proces”, është shprehur Spahiu, duke e konsideruar të dështuar menaxhimin e ndryshimeve të emrave të rrugëve në veri të Mitrovicës
