Presidentja Vjosa Osmani ka thënë se Kosova duhet ta forcojë mbrojtjen e saj, pasi sipas saj, Serbia ka qëllime “për të na kthyer të gjithëve në të kaluarën”.
Osmani tha se Rusia dëshiron të hapë një “front të ri kundër Perëndimit”, duke destabilizuar Ballkanin Perëndimor.
“Rusia dhe Putini duan të hapin një front të ri kundër Perëndimit duke destabilizuar Ballkanin Perëndimor. Dhe për këtë arsye, është thelbësore që Kosova të punojë krah për krah me aleatët, me partnerët nga bota demokratike, për t’u siguruar që ne të ndalojmë këto nisma destabilizuese nga Serbia, të ndihmuara dhe të nxitura nga Rusia, dhe në të njëjtën kohë të forcojmë mbrojtjen tonë në mënyrë që kur Serbia që ka qëllime për të na kthyer të gjithëve në të kaluarën, ne mund të vetëmbrohemi dhe të vazhdojmë të kontribuojmë për paqen dhe sigurinë në rajonin tonë e më gjerë”, tha presidentja në një intervistë për median polake, TVP World.
“Unë besoj se ka shpresë për një Ballkan Perëndimor që përfundimisht të bashkohet me Bashkimin Evropian dhe NATO-n. Por parakushti për të arritur rezultate të tilla është trajtimi i Serbisë për atë që është – një shtet satelit i Rusisë, i cili vetëm sa po rrit bashkëpunimin ushtarak, ekonomik dhe politik me Rusinë”, deklaroi Osmani.
Osmani ia atribuoi tensionet mes Serbisë dhe Kosovës politikave të Beogradit.
“Nuk është se Kosova dhe Serbia po kontribuojnë në tensione. Ka një vend që është Serbia që është kthyer në shtetin më të fortë të Putinit në Evropë. Dhe pastaj është Kosova dhe vendet e tjera të rajonit që janë vazhdimisht viktima të akteve të agresionit nga Serbia”, u shpreh presidentja Osmani.
