Presidentja e Kosovës, Vjosa Osmani, ka zhvilluar një takim të rëndësishëm mbrëmë me komandantin e KFOR-it, Gjeneralmajorin Enrico Barduani, në një darkë pune, ku u diskutuan çështje të sigurisë dhe bashkëpunimit ndërkombëtar në Kosovë.
Ky takim thekson angazhimin e vazhdueshëm të Kosovës dhe KFOR-it në ruajtjen e paqes dhe stabilitetit në rajon, si dhe mundësitë e forcimit të marrëdhënieve mes institucioneve të Kosovës dhe trupave paqeruajtëse ndërkombëtare, shkruan Gazeta Enigma.
Në postimin e saj në Facebook, Presidentja Osmani ndau disa fotografi nga takimi, duke theksuar rëndësinë e dialogut të vazhdueshëm për të siguruar një ambient të qetë dhe të sigurt për qytetarët e Kosovës.
Takimi shërbeu si një mundësi për të diskutuar jo vetëm situatën aktuale të sigurisë, por edhe sfidat dhe mundësitë për përmirësimin e bashkëpunimit mes institucioneve të Kosovës dhe KFOR-it, i cili ka një rol kyç në mbështetje të sigurisë dhe stabilitetit në vend.
“Me Komandantin e ri të KFOR-it, Gjeneralin Enrico Barduani, për një Kosovë ku mbretëron paqja e siguria për të gjithë qytetarët, në çdo cep të vendit tonë”, ka shkruar Osmani në Facebook.
Ndërkaq, më shumë detaje për takimin janë bërë të ditura përmes një njoftimi të lëshuar nga Presidenca, ku thuhet se gjatë takimit është diskutuar për çështje të sigurisë në vend.
Sipas njoftimit, Osmani ka nënvizuar përkushtimin e vazhdueshëm për një Kosovë të sigurt dhe stabile, si parakusht për zhvillim e prosperitet, ndërsa ka rikonfirmuar rëndësinë e koordinimit ndërmjet institucioneve të Kosovës dhe partnerëve ndërkombëtarë, për çështje të sigurisë, me qëllim të mbrojtjes së të gjithë qytetarëve dhe sovranitetit të vendit.
“Presidentja Osmani shprehu mirënjohje për KFOR-in, i cili ka shtuar numrin e trupave e të cilët po mbështesin institucionet e Kosovës në patrullim të kufirit me Serbinë.
Presidentja ripotencoi rreziqet që vijnë nga taktikat destabilizuese të Serbisë, sidomos për shkak të mungesës së dhënies së përgjegjësisë nga ana e Serbisë, si për aktin e agresionit të shtatorit 2023, ashtu edhe për sulmet ndaj KFOR-it, në maj 2023.
Ndër të tjera, në këtë takim, Presidentja Osmani dhe komandanti Barduani pohuan angazhimin e tyre të përbashkët për ruajtjen e një mjedisi të sigurt për të gjithë qytetarët, duke pranuar se bashkëpunimi dhe besimi i ndërsjellë janë bazë për paqe dhe stabilitet të qëndrueshëm“, shkruhet në komunikatën e Presidencës./GAZETAENIGMA/
