Shqiptarët iu drejtuan kutive të votimit të dielën, më 11 maj, për të shprehur vullnetin e tyre në zgjedhjet parlamentare, që pritet të formësojnë legjislaturën e re në Kuvendin e Shqipërisë.
Teksa kanë mbetur vetëm pak kuti për t’u numëruar, përbërja e re parlamentare tashmë ka marrë formë, me ndarjen e mandateve ndërmjet partive garuese.
Sipas të dhënave zyrtare të Komisionit Qendror të Zgjedhjeve, Partia Socialiste ka dalë forcë e parë me 83 mandate, duke siguruar shumicën e thjeshtë për të qeverisur e vetme.
Partia Demokratike-Aleanca për Shqipërinë Madhështore renditet e dyta me 50 mandate, ndërsa Partia Social Demokrate ka siguruar 3 mandate në Kuvend.
Ndërkaq, Partia Mundësia do të përfaqësohet me dy deputetë, ndërsa Nisma Shqipëria Bëhet dhe Lëvizja Bashkë kanë siguruar nga një mandat secila.
