Policia e Kosovës ka identifikuar 300 bimë narkotike të llojit mariuhanë, të mbjellura në bjeshkën e Roshkodolit në Deçan.
Policia e Kosovës përmes pajisjeve teknologjike lokalizoi vendin në një zonë të thellë malore.
“Me datë 29.07.2024 njësitet e specializuara kufitare së bashku edhe me njesinë e antidrogës, kanë shkuar në lokacionin e dyshuar, ku në vendin e ngjarjes janë gjetur 4 sera, në të cilat kishin qenë të mbjellura bimë të dyshuara narkotike të llojit marihuanë, të cilat dyshohet se ishin djegur nga persona të dyshuar. Në bazë të shikimit të vendit të ngjarjes dyshohet se kanë qenë të mbjellura rreth 300 bimë narkotike të madhësisë nga/deri në 1-2m gjatësi”, thuhet në njoftimin e policisë.
Lidhur me rastin njësitë përkatëse në vendin e ngjarjes kanë marrë provat materiale si në vijim:
• Mostra të bimëve narkotike,
• Një (1) armë AK – 47 me 32 copë fishekë,
• Një (1) fishekë i kalibrit për armë të gjuetisë etj.
Provat materiale të bimëve narkotike që kanë mbetur të pa djegura, pas konsultimit me prokurorin përkatës janë asgjësuar në vendin e ngjarjes, ndërsa është hapur rasti për veprat “Kultivim i bimëve narkotikëve” dhe “Posedim i paautorizuar i armëve dhe municioneve”.
Në lidhje me rastin meqenëse zona ndodhet afër kufirit, është komunikuar edhe Policia Kufitare e Republikës se Shqipërisë dhe ajo e Malit të Zi, të cilat kanë aktivizuar njësitet e tyre në zonat përkatëse të shteteve të tyre. /Gazeta Enigma
