Presidentja e Kosovës, Vjosa Osmani, ka nisur sot vizitën zyrtare dy ditore në Zvicër, shkruan Gazeta Enigma.
Në këtë vizitë, Osmani do të pritet me nderimet më të larta shtetërore.
Organet e sigurisë zvicerane, janë kujdesur që të marrin edhe masa të veçanta sa i përket trafikut.
Shefja e shtetit do të pritet me ceremoni shtetërore dhe nderime të larta ushtarake nga homologia e saj, Keller-Sutter, në sheshin qendror Bundesplatz në Bern sot në prezencë edhe të qytetarëve të shumtë.
Në kuadër të agjendës zyrtare, e para e vendit do të mbajë takime me presidenten e Zvicrës dhe Këshillin Federal, si dhe do të mbajë fjalim në Parlamentin e Zvicrës.
Poashtu, të dyja presidentet do të mbajnë një konferencë të përbashkët për media.
Ndërsa, në ditën e dytë të vizitës, Osmani dhe Keller-Sutter do të vizitojnë një ndërmarrje prodhuese në pjesën lindore të Zvicrës, si dhe një qendër të Universiteti Saint Gallen, e cila është e përkushtuar për zhvillimin e kulturës së të nxënit dhe të mësimdhënies, fushë me rëndësi të veçantë për të ardhmen e të rinjve në Kosovë dhe Zvicër.
