Një numër i minatorëve nga ndërrimi i parë në minierën e Trepçës në Stantërg, bojkotoi sot punën për shkak të vonesës së pagave për muajin qershor, por gjatë ditës u realizuan 50% të pagave dhe greva u ndërpre.
Kryetari i Sindikatës së minatorëve në Trepçë, Ibrahim Januzi bëri të ditur se mbështet grevën e minatorëve dhe kërkesat e tyre i sheh si të drejta.
Ai pranoi se një pjesë e punëtorëve nga ndërrimi i parë bojkotuan sot punën për shkak të mosekzekutimit të pagave, ndërsa për ndërrimin e dytë tha se nuk ka informacion nëse punëtorët kanë vazhduar me bojkot ose kanë hyrë në minierë.
Januzi konfirmoi se gjatë ditës u realizuan 50 për qind e pagave të punëtorëve.
“Si pakënaqësi e mosrealizimit të pagës së fundit është ngjallur pakënaqësi tek minatorët, të cilët kanë filluar një grevë…Ne si Sindikatë i mbështesim kërkesat e minatorëve dhe i shohim të drejta, legjitime dhe të pamohueshme … Në këto momente kemi informatë se është realizuar 50 për qind e pagave… Sa i përket ndërrimit të dytë unë nuk kam informacione se si do të zhvillohet… Realisht në ndërrimin e parë pjesa dërmuese e punëtorëve kanë qenë në grevë, përveç njësive primare siç janë sistemi i largimit të ujërave, sistemi i pompimit, kujdestaria… Jo, jo, sot nuk kam kërku takim me drejtorin”, tha Januzi.
Në anën tjetër, drejtori gjeneral i ndërmarrjes Trepça, Enis Abdurrahmani i tha KP përmes telefonit se 50 për qind e pagave u realizuan gjatë ditës së sotme dhe pjesa tjetër do të realizohet deri të premten.
Sipas tij, Trepça ka trashëguar borxhe nga e kaluara në vlerë prej rreth 6 milionë euro, të cilat përmes procesit përmbarimor është duke i kthyer në periudhat e tashme.
Drejtori Abdurrahmani potencoi se menaxhmenti është i zotuar që kompensimi i pagave të bëhet sipas realizimit të planit të prodhimit dhe planit të të hyrave financiare.
“Një pjesë e punëtorëve nga ndërrimi i parë kanë bojkotuar sot punën, derisa të gjithë punëtorët e ndërrimit të dytë kanë shprehur gatishmëri ta vijojnë punën. Gjatë ditës janë realizuar 50 për qind e pagave për punëtorët, ndërsa edhe pjesa tjetër pritet të realizohet deri të premten. Trepça ka trashëguar borxhe nga e kaluara në vlerë prej rreth 6 milion euro, të cilat përmes procesit përmbarimor është duke i kthyer në periudhat e tshme. Menaxhmenti është i zotuar që kompensimi i pagave të bëhet sipas realizimit të planit të prodhimit dhe planit të të hyrave financiare. Bojkoti dhe protestat e nxitura nga Sindikata janë të papranueshme. Menaxhmenti apelon tek të gjithë punëtorët që të mos manipulohen. Trepça është korporatë e cila bazuar në të hyrat dhe fitimet detyrohet të shpërndajë pagat dhe shpenzimet”, tha Abdurrahmani.
