Ish-ministri i Punëve të Jashtme, Enver Hoxhaj, ka folur për situatën në Lindjen e Mesme.
Ai ka thënë atje po kalohet një nga momentet më të rëndësishme në dekada.
Përmes një postimi në rrjetin social Facebook, Hoxhaj ka thënë se me rënien e regjimit të Bashar al-Assadit, Kosovës i hapet një mundësi e re për të tejkaluar kundërshtimin e Iranit ndaj pavarësisë së saj, në vende si Siria, Libani dhe Iraku, të cilat sipas tij, po dalin nga orbita e ndikimit iranian, falë politikës së mençur të Turqisë dhe Izraelit.
“Sot, qeveria e Kosovës nuk ka ende qëndrim për këto zhvillime dhe se si t’i përdorë ato për njohjen e mëtejshme të Kosovës. Kosova duhet të jetë ndër vendet e para që njohin qeverinë e përkohshme të Sirisë, një vend ku Serbia ishte aleate e regjimit brutal të Assadit, dhe të kthejë këtë moment në favor të njohjes së Kosovës nga Libani dhe Iraku”.
“Diplomacia e Kosovës duhet të dalë nga moratoriumi i vetë-imponuar ndaj njohjes ndërkombëtare të shtetësisë së Kosovës”, shkroi ai. /Gazeta Enigma
