Afati 38 ditor për regjistrimin e votuesve jashtë Kosovës për votim me postë në zgjedhjet e 12 tetorit përfundon sonte në orën 23:59.
Kjo është bërë e ditur nga zëdhënësi i Komisionit Qendror të Zgjedhjeve, Valmir Elezi.
Elezi mes tjerash theksoi se vetëm shtetasit e Kosovës që janë regjistruar për votim nga jashtë vendit do të mund të votojnë përmes postës në periudhën e cila nis më 17 shtator dhe dhe përmbyllet më 11 tetor.
Më tej, ai deklaroi se shtetasit e Kosovës që janë regjistruar për votim jashtë vendit, do të largohen nga lista e votuesve brenda vendit, kurse sqaroi edhe atë se çka ndodhë me ata që nuk regjistrohen për votim jashtë Kosovës.
“Është detyrim ligjor për KQZ-në që shtetasit e Kosovës që janë regjistruar për të votuar nga jashtë Kosovës, t’i largojë nga Lista e Votuesve brenda Kosovës e cila shpërndahet në vendvotime, në ditën e zgjedhjeve. Pra, një shtetas që regjistrohet për të votuar jashtë Kosovës, do ta gjejë emrin e tij për votim vetëm në Listën e Votuesve jashtë Kosovës”, transmeton Klankosova.tv
“Shtetasit e Kosovës që jetojnë jashtë vendit dhe që nuk janë regjistruar për votim me postë, janë në Listën e Votuesve brenda Kosovës, e cila shpërndahet në vendvotime në ditën e zgjedhjeve. Të dhënat për adresën e Qendrës së Votimit mund të shikohen këtu: https://qv.kqz-ks.org”, deklaroi Elezi. / Gazeta Enigma.
