Shumë vende të botës po përballen me përhapjen e madhe të variantit Omicron të COVID, ndonëse në Kosovë ende nuk është konfirmuar asnjë raste i ri, raporton Gazeta Enigma.
Ndërsa, testimet për konfirmimin e këtij variantit që shumë shpejt të kryhen në Insititutin Kombëtar të Shëndetësisë Publike të Kosovës (IKSHPK).
Kështu ka deklaruar për Gazetën “Enigma”, zëdhënësja e IKSHPK-së, Era Pireva e cila ka bërë të ditur se pritet që testet që detektojnë variantin Omicron të arrijnë sot në Kosovë.
“Varianti Omicron i SARS-CoV-2 mund të detektohet edhe me RT PCR test që në mënyre specifike e shënjon (targeton) ndonjë nga mutacionet e S proteinës së SARS-CoV-2. RT PCR kitet e këtilla të porositura nga IKSHPK priten te arrijnë në Aeroportin e Prishtinës me datën 23.12.2021 dhe varet nga procedurat e zhdoganimit se sa shpejt do të arrijnë në IKSHPK, kështu që shumë shpejt do të kryhet konfirmimi i variantit Omicron te SARS-CoV-2 ne IKSHPK”, ka thënë Pireva.
Ndërkohë, IKSHPK-ja është duke dërguar mostra pozitive në Gjermani për konfirmimin e pranisë së variantit Omicron, derisa Kosova është ende në pritje të këtyre rezultateve.
Omicron, variant që fillimisht u detektua në Afrikën e Jugut në muajin nëntor, besohet se ka shumë mutacione dhe mund të përhapet shumë shpejt.
Ndryshe, në Shqipëri sot janë konfirmuar dy raste të reja me këtë variant.
