Një 19-vjeçar nga fshati Piranë i Prizrenit ka humbur jetën në një aksident tragjik sot pas mesnate. Aksidenti ndodhi rreth orës 01:05, në fshatin Lutogllavë, në magjistralen Suharekë–Prizren, ka ndodhur një vetaksident trafiku.
Policia tha se 19-vjeçari ishte pasagjer në veturën që u vetaksidentua, ndërsa shoferi mori lëndime.
Lajmin e ka konfirmuar zëdhënësi i policisë për rajonin e Prizrenit, Shaqir Bytyqi.
“Sipas informatave të para dhe veprimeve fillestare hetimore, dyshohet se deri te aksidenti ka ardhur pasi drejtuesi i automjetit, mashkull rreth 19 vjeç, nuk e ka përshtatur shpejtësinë e lëvizjes me kushtet dhe rrethanat e rrugës, e cila ishte e lagësht si pasojë e reshjeve të shiut. Me këtë rast, drejtuesi ka humbur kontrollin mbi automjetin, i cili ka dalë jashtë rrugës. Si pasojë e aksidentit, pasagjeri, mashkull rreth 19 vjeç, nga fshati Piranë i Prizrenit, ka humbur jetën, ndërsa drejtuesi i automjetit ka pësuar lëndime trupore”.
Bytyqi tha se njësitet përkatëse policore, së bashku me ekipet e emergjencës, kanë dalë në vendin e ngjarjes. Lidhur me rastin është njoftuar prokurori kujdestar, me urdhër të të cilit trupi i pajetë është dërguar në Institutin e Mjekësisë Ligjore (IML), ndërsa i dyshuari është ndaluar në ndalim policor për 48 orë.
“Policia, në koordinim dhe bashkëpunim me Prokurorin e Shtetit, po ndërmerr të gjitha veprimet e nevojshme hetimore me qëllim të ndriçimit të plotë të rrethanave dhe shkaqeve të këtij aksidenti”.
