Leart Paqarada sezonin e ardhshëm do të luajë në Bundesligë. Ai do të jetë pjesë e skuadrës së Koelnit, pasi transferimi i tij është zyrtarizuar të martën. Paqarada te Koelni do të transferohet në fund të këtij sezoni si lojtar i lirë, pasi i skadon kontrata me St. Paulin.
Mbrojtësi i krahut të majtë, ka firmosur kontratë me Koelnin deri në verën e vitit 2026. Te Koelni janë ndarë tejet të lumtur që kanë arritur t’i sigurojnë shërbimet e Paqaradës prej sezonit të ardhshëm.
“Jemi shumë të lumtur që ishim në gjendje ta bidim Leartin që të jetë pjesë e ekipit tonë prej sezonit të ardhshëm. Ai ka treguar paraqitje të mira në Bundesligën 2 dhe ka cilësi të jashtëzakonshme”, ka thënë drejtori sportiv i Koelnit, Christian Keller.
28-vjeçari prej vitit 2020 është pjesë e St. Paulit, ndërsa ka luajtur edhe për Sandhausenin. Ai është kapiten i St. Paulit dhe këtë sezon ka një gol e katër asistime në të gjitha garat.
“Jam jashtëzakonisht krenar që do ta barti fanellën e Koelnit prej sezonit të ardhshëm. Të kthehem në qytetin ku jam rritur është ndjenjë e jashtëzakonshme. Megjithatë, deri në fund të sezonit, fokusi im do të jetë te St. Pauli”, ka thënë Paqarada.
