Kryetari i Kuvendit, Glauk Konjufca, ka shprehur zotimin e institucioneve të Kosovës për adresimin e çështjes së personave të pagjetur si një ndër prioritetet parësore pasi që në dialogun e deritashëm me Serbinë nuk i është kushtuar vëmendje e duhur, raporton Gazeta Enigma.
Ai gjatë një takimi me drejtorin rajonal për Evropë dhe Azi Qendrore (ICRC), Martin Schüepp, kanë diskutuar mbi angazhimet e kësaj organizate për sigurimin e të dhënave për personat e pagjetur dhe zbardhjen e fatit të tyre.
Konjufca tha se tendenca e shtetit serb që kreu gjenocid në Kosovë, ishte që trupat të mos gjenden kurrë dhe se shumë prej varrezave masive me trupat e shqiptarëve në Serbi ende nuk janë zbuluar, pasi Beogradi vazhdon t’i mbajë ato të fshehura, andaj kërkoi që sa më parë të hapen arkivat shtetërore të Serbisë.
Drejtori i ICRC-së dhe i pari i Kuvendit u pajtuan për shtimin e bashkëpunimit në të ardhmen, si dhe koordinimin e aktiviteteve për zbardhjen e fatit të personave të pagjetur nga lufta e fundit në Kosovë./Gazeta Enigma/
