Finalizimi i Projektligjit për shëndet riprodhues dhe fertilizim të asistuar mjekësorë sipas ministrit të Shëndetësisë, Arben Vitia, përveç që do të zvogëloj kostot financiare për qytetarët, do të jetë më afër tyre.
Ministri i Shëndetësisë, Arben Vitia, ka thënë se votimi në lexim të parë i Projektligjit për shëndet riprodhues dhe fertilizim të asistuar mjekësorë është i një rëndësie të lartë për qytetarët e vendit.
Ai është shprehur falënderues ndaj deputetëve që votuan pro këtij projektligji.
“Kuvendi i Kosovës miratoi në lexim të parë një ligj jashtëzakonisht të rëndësishëm për shumë qytetarë. I falenderohem deputetëve që e mbështetën!”
Ministri Vitia tutje ka thënë se ”shumëkush ka kaluar nëpër përvojën e mundimshme dhe të kushtueshme të fertilizimit të asistuar, IVF” duke shtuar se kjo ka qenë edhe barrë financiare për ta.
“Udhëtimet e shpenzimet janë kaq të mëdha saqë shumë familje kanë shpenzuar të gjitha kursimet e tyre, e jo rrallë edhe pronat, vetëm për ta siguruar këtë trajtim”.
Finalizimi i këtij ligji në hapin e ardhshëm nga Kuvendi do të hapë rrugën për këtë shërbim kaq të vyeshëm në institucionet tona publike dhe pa kosto shtesë.
Sipas Vitisë, projektligji i cili mori votat e deputetëve në lexim të parë, “ka si qëllim sigurinë dhe monitorimin e rregullsisë në të gjitha procedurat për fertilizimin e asistuar”, duke shtuar se “është një nismë që mbështet drejtëpërdrejt familjet e qytetarëve tanë”, ka thënë i pari i shëndetësisë në rrjetin social Facebook.
