Drejtori i Policisë, Samedin Mehmeti, gjatë raportimit në Komisionin për Siguri ka theksuar se elenti më shqetësues për Policinë e Kosovës është rritja e numrit të rasteve të dhunës në familje në Kosovë, raporton Gazeta Enigma.
“Elementi më shqetësues edhe që ka pas ngritje të rasteve edhe nga vitit 2019 edhe nga vitit 2020 është dhuna në familje. I kemi pasur 622 raste në vitin 2020, i kemi 889 në vitin 2021. Edhe nëse krahasohet me vitin 2020, prapë del ngritje”, u shpreh Mehmeti gjatë raportimit të tij në Komision.
Ndër të tjera, Mehmeti tha po ashtu se për gjashtë muaj është punuar në hetimin e 801 rasteve për krimin e organizuar dhe terrorizmin.
“Në këto raste janë hetuar 891 persona pjesëmarrës kurse janë arrestuar 552 persona”.
Mehmeti tutje ka folur edhe për numrin e shtuar të aksidenteve në trafik.
Ai ka thënë se një prej faktorëve në rritjen e numrit të aksidenteve është koha e gjatë e qëndrimit në izolim, derisa ka theksuar se Policia është duke operuar me plane operative me motoçikleta, me dron dhe njësite të tjera.
