Ekrem Maxhuni humbi jetën tragjikisht në moshën 56-vjeçari, pasi u godit për vdekje nga një kamion në rrugën Prishtinë – Mitrovicë, saktësisht në fshatin Stanoc. Shoferi që dyshohet se shkaktoi aksidentin fillimisht iku nga vendi i ngjarjes, por pas veprimeve hetimore, Policia ka arritur që ta identifikojë dhe i njëjti është arrestuar sot.
Sinjali mëson ekskluzivisht se i dyshuari është Hajrush Hasani, 46-vjeçar.
Arrestimin e Hasanit e ka konfirmuar sot për Sinjalin zëdhënësi i Policisë së Kosovës për Rajonin e Mitrovicës, Avni Zahiti.
“Si rezultat i hetimeve intensive, hetuesit e Njësisë së Trafikut Rrugor, kanë arritur të identifikojnë dhe arrestojnë të dyshuarin shoferin e automjetit transportues (kamion) i cili dyshohet për përfshirje në aksident trafiku me pasojë fataliteti i ndodhur dje me datën 5 janar 2024, rreth orës 16:43, në rrugën nacionale Mitrovicë-Prishtinë në fshatin Stanovc, ku ka humbur jetën viktima (këmbësori) mashkull kosovar”, tha Zahiti.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor për 48 orë.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
