Reshjet e shiut dhe paralajmërimi për përmbytje të mundshme ka mobilizuar institucionet e sigurisë dhe emergjencave në kuadër të Komunës së Prishtinës.
Drejtori për Siguri dhe Emergjenca në Prishtinë, Lulzim Fushtica ka thënë se intensiteti i reshjeve po rritet dhe se presin të ketë raste të vërshimeve, por sipas tij janë bërë të gjitha përgatitjet e nevojshme në këtë drejtim.
Fushtica ka deklaruar se nga bisedat dhe informacionet që kanë nga Instituti Hidrometeorologjik i Kosovës sot, nesër dhe pasnesër parashihet të ketë të reshura intensive që kryesisht është paralajmëruar për pjesën perëndimore të Kosovës, por që do të përfshijë edhe pjesët tjera e edhe kryeqytetin, por në intensitet më të vogël.
“Shpresoj që nuk do të kemi raste si në Bosnje e Hercegovinë, ne kemi bërë të gjitha parapërgatitjet. Nga sot kemi funksionalizuar Shtabin Emergjent. Kam qenë në kontakt me të gjithë përfaqësuesit që janë pjesë e shtabit, i kemi dërguar instruksionet që t’i angazhojnë ekipet kujdestare që të jenë në kujdestari 24/7, por kur kemi rrebeshe të shiut për fat të keq askush nuk më të jetë i përgatitur në të tilla raste”, ka theksuar ai për RTK.
Fushtica tha se Qendra Operative Emergjente funksionon 24 orë në 7 ditë të javës, e në të tilla raste shtohet edhe numri i zyrtarëve, prandaj ka bërë të ditur se të gjithë qytetarët mund të lajmërohen në numrat e kësaj qendre emergjente që janë 080012233 dhe 080012244 nëse kanë nevojë.
