Trajneri i Real Madridit, Carlo Ancelotti ka folur për El Clasicon e ardhshme kundër Barcelonës, që do të zhvillohet nesër (e diel) në kuadër të La Ligas.
Ancelotti ka folur në konferencën për shtyp para ndeshjes ndaj Barcelonës duke thënë se ekipi i tij është i motivuar për këtë ndeshje, teksa kundërshtarin e ka cilësuar si skuadër të mirë, por jo perfekte.
“Jemi mirë. Të motivuar dhe të emocionuar. Mund ta bëjmë, edhe pse e dimë se është shumë e komplikuar”, ka thënë fillimisht Ancelotti në konferencë.
“Barcelona është mësuar të na shtyjë në gjysmëfushën tonë. Kur e kemi topin, duhet ta shfrytëzojmë atë. Duhet të luajmë një ndeshje të kompletuar”.
“Nuk është aq e vështirë të përgatitesh për këto ndeshje, sepse nuk ka nevojë të motivosh lojtarët. Gjëja më e rëndësishme është t’u japësh lojtarëve idenë më të qartë se si ta luajnë ndeshjen”.
“Duhet të mbrohesh mirë sepse Barça është një ekip që zakonisht futet në gjysmëfushën e kundërshtarit. Por nuk është një ekip perfekt”.
“Barcelona mund të jetë mësuar ta shtyjë kundërshtarin prapa në gjysmën e vet, por asnjë ekip nuk është perfekt. Për të fituar, duhet të menaxhosh mirë gjithçka, si në sulm ashtu edhe në mbrojtje”.
“Është shumë e vështirë të fitosh La Ligën, ka të bëjë me qëndrueshmërinë. Barça ka një shans më të mirë sot, por nëse fitojmë…”, përfundoi trajneri i Real Madridit.
