Komisioni Qendror i Zgjedhjeve (KQZ) ka njoftuar se nga data 28 qershor deri më 29 gusht 2025 do të jetë e hapur periudha për ndërrimin e Qendrës së Votimit brenda komunës, në kuadër të përgatitjeve për Zgjedhjet Lokale.
Gjatë kësaj periudhe 64-ditore, qytetarët me të drejtë vote do të kenë mundësi të shohin se në cilën qendër votimi janë të regjistruar, dhe të kërkojnë ndërrimin e saj në një qendër më të afërt me vendbanimin e tyre brenda të njëjtës komunë.
“Këtë mund ta bëjnë në dy mënyra: Përmes platformës elektronike të KQZ-së, e cila do të bëhet e qasshme me fillimin e periudhës, ose duke paraqitur kërkesë në Komisionin Komunal të Zgjedhjeve në komunën ku janë të regjistruar si votues”, thuhet në njoftimin e KQZ-së.
KQZ inkurajon të gjithë qytetarët që të kontrollojnë të dhënat e tyre dhe të përfitojnë nga kjo mundësi për të lehtësuar procesin e votimit.
