Presidenti Donald Trump njoftoi të dielën se Rusia dhe Ukraina janë pajtuar për atë që ai e përshkroi si një “armëpushim energjetik”.
“Me efekt të menjëhershëm, ka një ARMËPUSHIM ENERGJETIK në luftën mes Rusisë dhe Ukrainës. Të dyja palët janë pajtuar. Mos e shkelni!”, tha presidenti në një postim në rrjetet sociale të dielën në mëngjes.
CNN ka kontaktuar Shtëpinë e Bardhë dhe Kremlinin për të marrë informacione se si u arrit marrëveshja dhe cilët mund të jenë hapat e ardhshëm. Një burim pranë presidentit ukrainas Volodymyr Zelensky i tha CNN se njoftimi ishte lajm i ri për ta, por se do të pajtohen nëse këtë e bën edhe Rusia.
I pyetur për postimin e Trumpit në Truth Social, një tjetër zyrtar ukrainas i tha CNN-it: “Sapo e lexuam, ashtu si ju”.
Njoftimi vjen disa ditë pasi Trump bisedoi me presidentin rus Vladimir Putin dhe të dy njoftuan një marrëveshje të diskutueshme për furnizimin e tregjeve me naftë dizel ruse.
Bisedimet me zyrtarë të lartë ukrainas dhe amerikanë, përfshirë dhëndrin e Trumpit, Jared Kushner, dhe të dërguarin e posaçëm Steve Witkoff, nisën në Miami teksa të premten u njoftua marrëveshja për naftën dizel, por presidenti ukrainas Volodymyr Zelensky e kritikoi ashpër lajmin. Trump tha vetëm të shtunën se Ukraina duhet të “marrë një udhëheqës të ri që mund të arrijë një marrëveshje”.
Nuk ishte menjëherë e qartë se çfarë çoi në njoftimin e së dielës. Në një intervistë më herët të dielën, Zelensky gjithashtu bëri thirrje për një armëpushim.
“Në rregull, nëse ata duan armëpushim energjetik, ne jemi të hapur ndaj kësaj”, tha Zelensky për Rusinë gjatë një interviste me ABC News. “Mos na sulmoni. Mos i vrisni fëmijët tanë. Ne do të ndalojmë sulmet ndaj naftës suaj dizel. Dhe mendoj se kjo është e drejtë, një marrëveshje e drejtë”.
