Kryeministri në detyrë, Albin Kurti, njëherësh edhe kryetar i Lëvizjes Vetëvendosje, ka dënuar sulmin ndaj kryetarit të VV-së në degën në Skenderaj, Hysni Mehanit.
Kurti në mbledhjen e Qeverisë në detyrë, deklaroi se veprime të tilla shpërfaqin, siç u shpreh ai, “mendësi banditeske”.
“Na erdhi lajmi që kryetari i Qendrës së Lëvizjes Vetëvendosje, njëherazi edhe kandidat për deputet, Hysni Mehani, u sulmua me grushte dhe u godit me kokë në gotë teksa po pinte kafe me deputeten Arjeta Fejza dhe aktivistë të tjerë. Qeveria e Republikës së Kosovës e dënon këtë sulm qyqar dhe të papranueshëm, që shpërfaq mendësinë banditeske. Veprimet e tilla nuk na trembin, e nuk na shtyjnë të tërhiqemi nga gara politike në asnjë qytet”, ka deklaruar Kurti.
Kurti po ashtu iu ka bërë thirrje institucioneve dhe organeve të rendit e drejtësisë të ndërmarrin veprimet e menjëhershme ndaj personave përgjegjës për sulmin fizik.
