Ministria e Mbrojtjes ka hapur një tender në vlerë të përgjithshme prej 3 milionë eurosh për ndërtimin e objekteve të reja në kazermat e Forcës së Sigurisë së Kosovës në Gjilan, Gjakovë dhe Istog.
Sipas dokumenteve të publikuara në platformën elektronike të prokurimit publik, projekti është ndarë në tri lote, nga një për secilën kazermë, ndërsa realizimi i tij është paraparë të zgjasë tri vjet.
Operatorët ekonomikë të interesuar mund të ofertojnë veçmas për secilin lot, në përputhje me kriteret dhe specifikimet teknike të përcaktuara në dosjen e tenderit.
Mjetet për realizimin e projektit janë paraparë nga FSK-ja, ndërsa investimi synon përmirësimin e infrastrukturës ushtarake, rritjen e kapaciteteve të forcës dhe krijimin e kushteve më të mira për personelin ushtarak.
Punimet në kazermat e Gjilanit, Gjakovës dhe Istogut pritet të zhvillohen në faza gjatë tre vjetëve të ardhshëm.
Ky projekt është pjesë e investimeve të Ministrisë së Mbrojtjes për modernizimin e infrastrukturës së FSK-së dhe forcimin e kapaciteteve të saj operacionale.
