Anëtari i Aleancës për Ardhmërinë e Kosovës (AAK), Daut Haradinaj, ka reaguar lidhur me vizitën e një grupi serbësh në Pejë dhe Deçan, të cilët gjatë qëndrimit në Beograd kanë përdorur sloganin “Kosova është Serbi”.
Përmes një postimi, Haradinaj ka kritikuar Qeverinë e Kosovës, duke ngritur edhe çështjen e deklaratave të fundit të ministrit për Kthim dhe Komunitete, Nenad Rashiq, lidhur me themelimin e Asociacionit të Komunave me Shumicë Serbe.
Haradinaj ka kërkuar të bëhet e ditur se kush ua ka dhënë lejen këtij grupi për të vizituar Pejën dhe Deçanin.
“Dje, ministri i Kurtit foli për krijimin e Asociacionit, ndërsa sot paska pasur invazion nga serbët fitues në Beograd, me sloganin ‘Kosova është Serbi’. Lejen për ta vizituar Pejën dhe Deçanin, kush ua dha?”, ka shkruar Haradinaj.
Ai ka përmendur edhe çështjen e Manastirit të Deçanit, duke kritikuar vendimet e mëparshme të institucioneve.
Në fund të reagimit, Haradinaj ka kërkuar transparencë nga institucionet për lejet e vizitave të tilla.
