Kryeministri i Republikës së Kosovës, Albin Kurti vizitoi për ngushëllime familjen Sadrija në fshatin Ujz të Gjakovës, të cilët kanë humbur dy fëmijët pasi zjarri kishte kapluar shtëpinë e tyre derisa ata ishin në gjumë.
Në njoftimin e bërë nga zyra e kryeministrit thuhet se “Kurti u shprehu ngushëllime familjarëve dhe i inkurajoi që të gjejnë forcë për ta përballuar dhimbjen për vdekjet e rënda të fëmijëve të tyre, të moshës 12 dhe 13 vjeçar”.
“Ai tha se bashkëndjen me familjarët dhe se institucionet e Kosovës do t’ju qëndrojnë afër. Qeveria e Republikës së Kosovës do të ndajë 40 mijë euro ndihmë për familjen Sadrija. Familjarët e falënderuan kryeministrin për vizitën dhe për kujdesin e treguar nga Qeveria e Kosovës”, thuhet në njoftim.
Ndryshe, Policia e Kosovës për rajonin e Gjakovës kishte bërë të ditur se dy fëmijë kanë vdekur në fshatin Ujz të Gjakovës pasi një zjarr ka kapluar shtëpinë.
