Ministrja e Drejtësisë, Albulena Haxhiu, gjatë fjalës së saj në panelin e organizuar nga Tirana Connectivty Forum 2021, ka prezantuar prioritetet e ministrisë të cilën ajo e udhëheq drejt angazhimit të reformës në sistemin e drejtësisë që ka ndërmarrë Qeveria e Kosovës.
Haxhiu tha se fokusi i Ministrisë së drejtësisë është i përqendruar në katër prioritete:
Reforma në drejtësi përmes implementimit të strategjisë për sundimin e ligjit dhe vettingun në sistemin e drejtësisë; Lufta ndaj krimit të organizuar dhe korrupsionit; Adresimi i dhunës në familje, dhunës ndaj grave, dhunës në baza gjinore si fenomene që e dëmtojnë zhvillimin e mbarë shoqërorë; Adresimi i krimeve të kryera gjatë luftës së fundit në Kosovë.
“Në përputhje me zotimet tona, ne jemi duke punuar për vettingun në sistemin e drejtësisë. Në këtë drejtim ne kemi përfunduar Koncept-dokumentin për zhvillimin e procesit të vettingut në sistemin gjyqësor dhe prokurorial i cili do të miratohet nga Qeveria javës që vjen dhe që i hapë rrugën ndryshimeve kushtetuese dhe ligjore”, është shprehur Haxhiu, transmeton Klankosova.tv.
Ajo tha se vettingu është një ndër top prioritetet e Ministrisë së Drejtësisë dhe është një proces me rëndësi të madhe për vendin, për ta siguruar integritetin e për ta kthyer besimin e qytetarëve në sistemin e drejtësisë.
