Kryeministri i Kosovës, Albin Kurti ka deklaruar se arsimi është burim i rëndësishëm për zhvillimin e qëndrueshëm ekonomik dhe social të Kosovës, prandaj edhe renditet lart në prioritetet e qeverisë.
Këto komente Kurti i bërë pas takimit që pati me një delegacion nga Washingtoni, të përbërë nga ish-zëvendës asistentin kryesor dhe ushtruesin e detyrës së ndihmës sekretarit në Byronë e Çështjeve Arsimore dhe Kulturore të Shteteve të Bashkuara të Amerikës, aktualisht kryetarin e Bordit të Këshillit Amerikan për Edukim Ndërkombëtar, Mark Taplin, nënkryetarin e këtij këshilli, Michael Curtis dhe përfaqësuesin e Këshillit Amerikan për Edukim Ndërkombëtar në Kosovë, Gjeni Shporta.
Kryeministri Kurti tha se vlerëson lart kontributin e KAEF-it dhe përfituesve të tij në ekonominë edhe shoqërinë tonë.
Sipas tij, shumë prej tyre janë individë që falë përvojave dhe aftësive të krijuara gjatë studimeve në universitete amerikane japin kontribut të çmueshëm në sektorin privat dhe publik.
Ai shtoi se arsimi është burim i rëndësishëm për zhvillimin e qëndrueshëm ekonomik dhe social të Kosovës, prandaj edhe renditet lart në prioritetet e qeverisë.
“Të pranishmit u njoftuan edhe për synimet e qeverisë për ta orientuar arsimin e lartë drejt kërkimit shkencor nëpërmjet themelimit të Fondit të Hulumtimeve dhe angazhimin në sigurimin e bursave për studim brenda dhe jashtë vendit për studentë të dalluar”, thuhet në një komunikatë të Qeverisë.
Taplin, Curtis dhe Shporta e falënderuan kryeministrin Kurti dhe zëvendësministrin e arsimit, Dukagjin Pupovci për takimin dhe për gatishmërinë për bashkëpunim. /Gazeta Enigma/.
