Bombarduesi B-2 Spirit, i përdorur së fundmi nga Forcat Ajrore të SHBA-së për sulmet ndaj objekteve bërthamore të Iranit, është një nga aeroplanët më të avancuar dhe strategjikë në arsenalin amerikan.
Ky avion fluturoi për herë të parë në vitin 1989 dhe u përdor për herë të parë në luftime në vitin 1999 gjatë Luftës së Kosovës, në kuadër të Operacionit Allied Force të NATO-s, duke kryer fluturime pa ndalesë nga baza e tij në Missouri për të goditur objektiva serbe.
B-2 Spirit është i pajisur me katër motorë, mund të bartë armë bërthamore ose konvencionale dhe operohet nga një ekuipazh prej dy personash. Ai ka një kapacitet ngarkese prej 18,000 kilogramësh dhe mund të fluturojë për distanca të gjata falë mundësisë për furnizim me karburant në ajër.
Ky bombardues është përdorur edhe në misione të tjera të rëndësishme, si sulmet në Afganistan në vitin 2001 dhe më së fundi në Jemen nga baza në Diego Garcia. Në flotën amerikane ka vetëm 20 avionë të këtij lloji, të vendosur në bazën ajrore Whiteman në Missouri, dhe secili kushton rreth 2 miliardë dollarë.
Përdorimi i B-2 në sulmet ndaj Iranit tregon rëndësinë strategjike të këtij aeroplani në operacionet moderne ushtarake dhe fuqinë e tij për të goditur objektiva të rëndësishëm me precizion të lartë.
