Kryetari i PDK-së, Enver Hoxhaj, ndryshe prej deklarimeve të bashkë partiakeve të tij, ka komentuar mungesën e kryeministrit Albin Kurti në seancën e sotme në Kuvend e Kosovës, raporton Gazeta “Enigma”.
Ai thotë se prej që e mori detyrën, Kurti është parë vetëm në fushatën zgjedhore në Shqipëri, ndërkohë që e konsideron ndarjen e 11 milionë eurove në veri si skandal.
“Albin Kurti është zhdukur. Të vetmet herë që u pa prej se e mori detyrën si kryeministër ishin shfaqjet e tij gjatë zgjedhjeve në Shqipëri duke ndërhyrë në politikën e brendshme të një shteti. Mungesa e vaksinave, mungesa e programit qeverisës, e transparencës për dialogun, ndarja e 11 milionë eurove për pagesën rrymës së serbëve dhe bizneseve të tyre në veri janë disa nga dështimet e para të plotësuara këto ditë edhe me skandalet e ministrave të tij. Ai është vetëm hija e një kryeministri, që të vetmet deklarata politike i ka “mbrojtjen dhe arsyetimin e qëndrimeve skandaloze të vartësve në kabinetin qeveritar”, ka thënë ai.
LEXO EDHE: Ambasadori gjerman i del në mbrojtje Donika Gërvallës dhe i dënon zhvillimet e sotme në Kuvend
Tutje ai ka kritikuar edhe ministren e Jashtme për gjuhën e saj ndaj UÇK-së.
“E para në listë është ministrja Donika Gërvalla-Schëarz e cila nuk po ndalet së foluri dhe me vetëdije për “krimet” kinse të UÇK-së. Ende nuk e dëgjuam asnjë fjalë për krimet dhe gjenocidin serb në Kosovë. Kulmi ishte sot në Kuvend, ku në pritje të një kërkimfalje prej saj ndaj mijëra viktimave shqiptare në Kosovë, ajo shkoi më tej duke e marrë në mbrojtje Serbinë. Në vend se të tregoj për planet si ministre e jashtme në cilën organizatë do të aplikoj Kosova dhe ku ka ngecur procesi i njohjeve, ajo zgjodhi konfliktin me opozitën. Por përpjekja e sotshme e saj dhe e bashkëpartiakëve për t’ia mbyllur gojën opozitës dështoi. Sepse PDK nuk do të nënshtrohet dhe zmbrapset para asnjë presioni. Sepse Kosova ka një kryeministër hije me qeveri praktikantësh, që agjendën ia diktojnë ministrat e tij me skandale dhe jo me punë për të cilën janë votuar masivisht nga qytetarët e Kosovës”, shtoi ai./Gazeta Enigma
