Ish i dërguari Special i Shteteve të Bashkuara të Amerikës, Richard Grenell, është kërcënuar me jetë nga një shqiptar.
Një person me emrin Bekim Xhika i ka thënë atij përmes Instagramit se do t`ia këpusin kokën në rast se vjen në Shqipëri.
“Nëse vjen në Shqipëri ne do ta heqim kokën. Po të presim ty. Mbaje mend. Mos harro”, thuhet në mesazhin që Xhika i ka nisur Grenell.
Mesazhi kërcëues vjen një ditë pas postimit të Grenellit në Twitter ku i lartësoi “heronjtë” e betejës së Vidovdanit.
“Sot nderojmë heronjtë Vidovdan. Në këtë ditë në 1389, filloi beteja kundër Osmanëve në Kosovë. Sot është një ditë përkujtimore për Shën Princin Llazar dhe dëshmorët e shenjtë serbë”, ka shkruar ai.
Vetë Grenell ka kërkuar që Policia Shqiptare të merret me këtë kanosje ndaj tij.
