Kampionia e Kosovës, Hajvalia është eliminuar nga Liga e Kampionëve për Femra, pasi humbi nga kampionia e Shqipërisë, Vllaznia në ndeshjen e luajtur në stadiumin “Loro Boriçi” në Shkodër me rezultat 4-2.
Kjo përballje i takoi grupit të 7-të të raundit të parë kualifikues, ku Vllaznia dhe Valuri i Islandës kaluan tutje.
Gresa Berisha (16’, 92’), Lucie Gjini (44’) dhe Maria Bashka (60’) shënuan për fitoren e Vllaznisë.
Ndërkohë, golat për Hajvalinë i realizuan Lumbardha Misini (34’) dhe Bardha Mahmuti (68’).
Pas kësaj humbjeje, Hajvalia do të luajë ndeshjen për vendin e tretë, ku do të përballet me ekipin nga Turqia, Fomget Gençlik.
Ekipi turk u mposht në gjysmëfinale nga Valuri i Islandës 2-1.
Valuri i Islandës do të luaj për vendin e parë me Vllazninë dhe ekipi që fiton, do të avancojë në raundin e dytë kualifikues.
Për Hajvalinë, kjo është hera e dytë rresht që merr pjesë në Ligën e Kampionëve.
