Arbnor Spahiu, ish-pjesëtar i Njësisë Speciale Operative të Policisë së Kosovës, i cili u ndalua të dielën nga autoritetet serbe në pikën kufitare në Horgosh, është nisur pak çaste më parë drejt Suboticës, ku pritet të merret në pyetje nga prokuroria serbe.
Avokati i tij, Artan Koci, ka theksuar se nuk ekziston asnjë procedurë penale ndaj Spahiut dhe është i bindur se gjithçka do të përfundojë në favor të tij.
“Prokurori do ta marrë në pyetje dhe më pas do të vendosë. Jam i bindur se gjithçka do të përfundojë në të mirë të klientit tim, pasi që nuk ka asnjë bazë për ndalimin e tij”, ka deklaruar avokati Koci.
Spahiu u ndalua pa ndonjë njoftim paraprak apo urdhër arresti në fuqi, ndërsa autoritetet serbe ende nuk kanë dhënë ndonjë deklaratë zyrtare lidhur me arsyet e ndalimit të tij.
