Kombëtarja U18 e Kosovës në hendboll e ka shënuar fitoren e dytë në IHF Trophy për zonën evropiane.
Të premten (sot) pasdite në Pallatin e Rinisë në Prishtinë, Kosova U18 fitoi ndaj Britanisë së Madhe me rezultat 17:15.
Ndeshja ishte e fortë, sidomos në mbrojtje, ndërsa këtë e dëshmon edhe numri i golave të shënuar. Olsi Mulaj udhëhoqi Kosovën duke shënuar më shumë se gjysmën e golave (9). Noah Sanyal shënoi gjashtë gola për Britaninë e Madhe. Ndërkohë Gjeorgjia U18 ka shënuar fitore të pritur ndaj Shqipërisë. 38:13 në të mirë të Gjeorgjisë ishte rezultati në fund.
Gjeorgjia ka tri fitore dhe udhëheq në tabelë me gjashtë pikë. Bullgaria dhe Kosova i kanë nga 4 pikë. Britania e Madhe i ka dy pikë, kurse Shqipëria mbetet pa pikë.
Ndeshjet e fundit janë edhe vendimtare për titull të kampionit.
Të shtunën prej orës 12:00 takohen Britania e Madhe dhe Bullgaria, ndërsa Kosova e Gjeorgjia luajnë prej orës 16:00. Djemve tanë u duhet përkrahja në palestër, andaj jeni të ftuar që ata t’i përcillni nga afër.
