Këshilli Prokurorial i Kosovës (KPK) ka publikuar rezultatet e testit kualifikues për procesin e rekrutimit dhe emërimit të 21 prokurorëve të rinj në prokuroritë themelore të Republikës së Kosovës, raporton Gazeta “Enigma”.
Sipas Komisionit për Rekrutim të KPK-së dhe në përputhje me nenin 21 të Rregullores nr. 02/2022, 138 kandidatë kanë kaluar me sukses këtë fazë të testimit, ndërsa 190 kandidatë nuk e kanë kaluar, përfshirë 8 të diskualifikuar dhe një kandidat që ka abstenuar.
Testi kualifikues u mbajt më 30 gusht 2025 në Akademinë e Kosovës për Siguri Publike në Vushtrri, ku morën pjesë 330 kandidatë, ndonëse të drejtë testimi kishin 402 kandidatë (211 burra dhe 191 gra).
Kandidatët që nuk janë të kënaqur me rezultatin, kanë të drejtë të parashtrojnë ankesë pranë Komisionit për Rishqyrtim, brenda tri ditësh nga data e shpalljes së rezultateve.
KPK ka bërë të ditur se procesi i rekrutimit do të vazhdojë me testin me shkrim dhe intervistat, të cilat do të monitorohen nga Instituti i Kosovës për Drejtësi (IKD). Po ashtu, edhe Misioni i Bashkimit Evropian për Sundimin e Ligjit (EULEX) ka vëzhguar këtë proces.
Në komunikatën për media, KPK ka theksuar se gjithë procesi do të zhvillohet në përputhje me parimet e meritokracisë, profesionalizmit dhe paanësisë, duke garantuar transparencë dhe zbatim të standardeve ndërkombëtare në fushën e drejtësisë.
