Pak më parë u raportua për një rast të kanosjes ndaj ministres së Drejtësisë, Albulena Haxhiu, për çka Prokuroria Themelore në Prishtinë ka nisur hetimet, ndërkohë që sot është arrestuar personi i dyshuar.
Sinjali ka mësuar se personi që ra në prangat e Policisë, si i dyshuar për këtë rast është Visar Dabiqaj, 27-vjeçar, i cili tashmë ndodhet nën masën e ndalimit
Burimet brenda Prokurorisë kanë bërë me dije se Dabiqaj dyshohet se e ka kërcënuar ministren Haxhiu përmes rrjetit social “Instagram”, në një postim që ajo kishte bërë në këtë platformë.
Posa Policia është vënë në dijeni për rastin, ka arritur që ta identifikojë të dyshuarin dhe i njëjti është arrestuar gjatë ditës së sotme.
Siç mëson Sinjali, i dyshuari është shoqëruar në stacion policor, ku ka dhënë deklaratën e tij lidhur me veprën me të cilën ngarkohet dhe motivin që e ka shtyrë për kërcënimin e ministres Haxhiu.
Pas përfundimit të procedurave policore, Prokurori i Shtetit ka urdhëruar që i dyshuari të dërgohet në mbajtje dhe brenda afatit ligjor të dorëzohet kallëzimi penal.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
