Në fund të muajit të kaluar, Gjykata Kushtetuese e shpalli jokushtetues Ligjin për Këshillin Prokurorial të Kosovës (KPK). Mirëpo, Ministria e Drejtësisë thotë se do ta ridërgojë atë sërish në kuvend brenda periudhës kohore prej një muaji me ndryshimet sipas aktvendimit të Kushtetueses. Njohësit e drejtësisë thonë se duhet një ligj i ri ndërsa u shprehën skeptikë se për kaq pak kohë mund të shkojë i njëjti në kuvend për miratim.
Ministrja e Drejtësisë, Albulena Haxhiu, deklaroi për KosovaPress se janë duke punuar që sa më shpejt ta procedojnë në Kuvendin e Kosovës, pasi nuk mund të lejojnë korporatizmin në Këshillin Prokurorial të Kosovës.
“Unë besoj që brenda një muaji do të procedohet në Kuvendin e Kosovës, mund të procedojmë edhe më herët, mirëpo e jap si kohë maksimale që do të riprocedohet në Kuvendin e Kosovës sepse një gjë që e ka adresuar edhe Komisioni i Venecias edhe vetë Gjykata Kushtetuese është korporatizmi brenda Këshillit Prokurorial të Kosovë. Si ministre e Drejtësisë dhe si Qeveri e Kosovës nuk mund të lejojmë që korporatizmi të vazhdojë përbrenda KPK-së, prandaj edhe jemi duke punuar që shumë shpejt t’i bëjmë ndryshimet. E kemi parë aktgjykimin e kemi lexuar aktgjykimin dhe do ta procedojmë atë”, u shpreh Haxhiu.
Por, ndryshe nga pretendimet e Haxhiut, dilema kanë njohësit e sistemit të drejtësisë.
Drejtori ekzekutiv i Institutit të Kosovës për Drejtësi, Ehat Miftaraj, shprehet skeptik se ky ligj brenda një muaji mund të shkojë për votim përsëri në Kuvend.
Ai insiston se ky ligj nuk është përfshirë ende as në agjendën legjislative për vitin 2023 dhe si i tillë duhet të krijohet ligj i ri.
Viola Bunjaku, monitoruese në Lëvizjen Fol, e konsideron të domosdoshme që në ndryshimet e ligjit të KPK-së duhet të përfshihen ndryshimet e paraparë në aktvendimin e Gjykatës Kushtetuese.
Në fund të muajit mars Gjykata Kushtetuese e Kosovës e ka shpallur të pavlefshëm Ligjin për KPK-në.
E këtë vendim të Kushtetueses, ministrja e Drejtësisë, Albulena Haxhiu, e ka quajtur absurd, madje në një konferencë për medie deklaroi se Kushtetuesja ka injoruar në tërësi të dy opinionet e Komisionit të Venecias në lidhje me këtë ligj duke i dhënë një goditje të rëndë Kosovës, por edhe duke penguar reformën në drejtësi./KP
