Gjykata Themelore në Prishtinë, i ka caktuar 30 ditë paraburgim Hashim Rexhepit, pronar dhe instruktor në poligonin e shenjëtarisë “Fazani-S”, në të cilin ka vdekur një 24-vjeçare më 29.08.2025.
Sipas prokurorit të shtetit, ekziston dyshimi i bazuar se Hashim Rexhepi, si instruktor i poligonit, duke mos vepruar sipas rregullave ka shkaktuar rrezik për jetën e njerëzve dhe është ngarkuar me veprën “Shkaktim i rrezikut të përgjithshëm”.
“…në atë mënyrë që si instruktor, duke lënë tani më të ndjerën L.S dhe dëshmitarin A.R që të pajisen me armë zjarri dhe municion dhe te njëjtit të hynë brenda në poligon ku zhvillohet gjuajtja, pa mbikëqyrjen e tij, ku si pasojë e kësaj, L.S gjatë manovrimit me armë qëllon veten në pjesën e abdomenit duke i shkaktuar vetes lëndime të renda trupore dhe si pasojë e njëjta rreth orës 21:05 ndërron jetë në QKUK në Prishtinë”- thuhet në arsyetimin e Gjykatës Themelore të Prishtinës.
Ky dyshim sipas vendimit për paraburgim që e ka siguruar KALLXO është i bazuar në prova, deklarata të dëshmitarëve dhe në fotografi. Sipas Gjykatës, nëse i pandehuri lihet në liri, mund të arratiset me qëllim shmangien e përgjegjësisë penale.
Mbrojtja e të pandehurit, e ka kundërshtuar caktimin e paraburgimit, duke thënë se nuk ekziston asnjë dyshim se Hashim Rexhepi mund të arratiset.
“Nuk ka asnjë dyshim të bazuar se i mbrojturi im do të fshihet pasi që pas dhënies së ndihmës së parë, i njëjti ka kontaktuar menjëherë Policinë. Nuk ka asnjë dyshim se i njëjti mund të asgjësoj apo fsheh provat, përkundrazi ka ndikuar në sigurimin dhe mbledhjen e provave”- citohet të këtë thënë Besiana Ismaili, avokatja e Hashim Rexhepit.
Përveç se e mbështet deklaratën e avokates, Hashim Rexhepi, në seancën për caktimin e masës së sigurisë nuk ka deklaruar diçka tjetër, duke thëne se “nuk kam çka të shtoj”.
Masa e paraburgimit për të do të zgjas deri më 30.09.2025.
