Mikrobiologu në Institutin Kombëtar të Shëndetësisë Publike të Kosovës tha se vaksinimi më i madh i popullatës me të dy dozat e vaksinës do të zvogëlonte ose parandalonte përhapjen e një vale të re të mundshme të coronavirusit në Kosovë.
Ai thotë se një rritje të numrit të përgjithshëm të rasteve me COVID-19 është e pritshme, por sipas tij, kjo nuk do të jetë substanciale si herëve tjera, pasi që kategoria më e rrezikuar, siç janë të moshuarit dhe ata me sëmundje kronike, tashmë i kanë marrë vaksinat.
“Përhapja e një vale të re varet nga situata e përgjithshme globale, në kontinent (Evropë) dhe tani në rajon. Në Kosovë nuk ka variant Delta që përhapet më shpejtë sesa varianti origjinal. Por, kjo nuk do të thotë që nuk do të arrijë në një të ardhme të afërt. Nga ajo që kemi parë në Britani të Madhe, kemi pasur rritje dhe kjo ka qenë kryesisht te moshat e reja dhe te personat që nuk janë vaksinuar apo nuk e kanë kryer krejt vaksinimin me dy dozat”, thotë ai.
Raka shton se në momentin që vaksinohet popullata me të dyja doza, prekja e personave me virus që qarkullon në botë, ulet në minimum.
“Vaksinimi i plotë është një prej përparësive që duhet të shfrytëzohet në maksimum”, tha ai.
Në shumë vende të botës janë ngritur shqetësime të mëdha për një valë të re të infektimeve për shkak të përhapjes së variantit Delta të coronavirusit, i cili besohet që është më i transmetueshëm se variantet e tjera.
Por, Organizata Botërore e Shëndetësisë ka thënë se në përgjithësi vaksinat edhe ndaj këtij varianti mbeten shumë efektive.
Transmetimi i këtij varianti paraqet problem te vendet që kanë përqindje më të ulët të popullatës së vaksinuar.
Infektologu Ilir Toaj thotë se në dy apo tre muajt e ardhshëm, Kosova do të duhej të vaksinojë më shumë se gjysmë milion qytetarë.
“Goditjen vendimtare të pandemisë për Kosovën mund të japin autoritetet, duke vaksinuar një numër të madh të popullatës”, thotë Tolaj, shkruan Evropa e Lirë.
