Presidentja e Kosovës, Vjosa Osmani, të mërkurën është takuar me sekretarin e Jashtëm britanik, David Lammy, teksa ka kërkuar formimin sa më të shpejtë të institucioneve të vendit, raporton Gazeta Enigma.
Osmani theksoi se “zhvillimet gjeopolitike janë të shpejta”, dhe sipas saj “globi nuk na pret”.
“Ka kohë të mjaftueshme deri në përgatitjen e seancës konstituive, i uroj suksese partive politike, Kuvendit dhe shpresoj që ky proces të shkojë sa më mirë. Është me rëndësi që sa më parë të kemi konstituimin e Kuvendit dhe formimin e një qeverie, sepse zhvillimet gjeopolitike janë të shpejta dhe globi nuk na pret”, ka thënë Osmani.
Ajo theksoi se nuk do të ndërhyjë në çështjet e koalicioneve. “Siç e dini, unë si presidente nuk kam të drejtë vote dhe pavarësisht se në të kaluarën ka pasur president që janë përzier në çështjen e koalicioneve, i konsideroj ato çështje partiake dhe sipas Kushtetutës nuk janë detyrë e imja. Jam besimplotë që deputetët do të bëjnë çmos që kjo seancë të jetë e suksesshme”, ka theksuar Osmani.
Kujojmë se seanca për konstituimin e Kuvendit është caktuar më 15 prill. / Gazeta Enigma.
