Deputeti i Lëvizjes Vetëvendosje, Adnan Rrustemi, ka kërkuar nga të gjithë deputetët që të japin kontributin e tyre në procesin e Vettingut.
Rrustemi i cili është edhe kryetar i Komisionit për Legjislacion, në seancën e Kuvendit të Kosovës theksoi se Vettingu ka vetëm një synim që të kemi një sistem të drejtësisë që përmbush mandatin që ka.
“Është thelbësore që çështjet jetike në vendin tonë siç është edhe drejtësia duhet të jemi të gjithë së bashku për të arritur përmirësim të qëndrueshëm të sistemit të drejtësisë dhe me eliminimin e problemeve ekzistuese të theksuara nga raporte të ndryshme kombëtare dhe ndërkombëtare dhe së fundmi edhe nga Komisioni i Venecias, në çështje të tilla është e rëndësishme që secili prej nesh pozitë dhe opozitë të japim kontributin maksimal për të siguruar një proces efikas dhe efektiv. Kthimi i besimit të qytetarëve në sistemin e drejtësisë e garantimi i një sistemi të paanshëm dhe të pavarur është obligim për secilin prej nesh. Vettingu ka vetëm një synim që të kemi një sistem të drejtësisë që të përmbush mandatin që ka me profesionalizëm, pavarësi ,efikasitet në të gjitha nivelet e të gjitha rastet pa dallim”- tha Rrustemi.
