Shtetet e Bashkuara do të dërgojnë 3 mijë trupa shtesë në Poloni në ditët në vijim për të ndihmuar në sigurimin e aleatëve të NATO-s, i thanë Reuters të premten katër zyrtarë amerikanë, ndërsa Rusia zhvilloi stërvitje ushtarake në Bjellorusi dhe Detin e Zi pas grumbullimit të forcave të saj pranë Ukrainës.
Rusia po grumbullon më shumë trupa pranë Ukrainës dhe një pushtim mund të ndodhë në çdo kohë, ndoshta para përfundimit të Lojërave Olimpike Dimërore të këtij muaji, kanë thënë të premten Sekretari amerikan i Shtetit, Antony Blinken dhe një komunikatë e lëshuar nga Shtëpia e Bardhë.
Imazhet komerciale satelitore të publikuara nga një kompani private amerikane treguan dislokime të reja ushtarake ruse në disa lokacione afër Ukrainës.
Zyrtarët, duke folur në kushte anonimiteti, thanë se dislokimi i trupave amerikane do të vijë nga Divizioni i 82-të Ajror i bazuar në Fort Bragg, Karolina e Veriut, dhe jo nga brenda forcave amerikane në Evropë.
Ata pritet të jenë në Poloni brenda javës së ardhshme, thanë ata.
Një nga zyrtarët e përshkroi atë si një vendosje të rëndësishme.
Një zyrtar tjetër ka thënë se urdhri i vendosjes u nënshkrua nga sekretari i Mbrojtjes Lloyd Austin nën drejtimin e presidentit Joe Biden.
