Sekretari i përgjithshëm i NATO-s, Jens Stoltenberg, është shprehur i gatshëm të takohet me presidentin e Serbisë, Aleksandër Vuçiq, teksa ka bërë thirrje për shtensionim të situatës në veri të Kosovës.
Kështu është shprehur ai në Vilnius të Lituanisë ku po mbahet Samiti i NATO-s, teksa është pyetur për kërkesën e presidentit serb për takim pas këtij samiti.
“Jam në kontakt të rregullt me presidentin Aleksandër Vuçiq dhe jam i gatshëm ta takoj. Jemi të shqetësuar për tensionet e ngritura në Kosovë, dhe u bëjmë thirrje palëve për depërshkallëzim dhe që të përmbahen nga veprimet që mund të qojnë në ngritjen e mëtejme të tensioneve në rajon”, ka thënë ai.
Stoltenberg përsëriti se NATO është në Kosovë për të garantuar siguri dhe stabilitet në rajon.
“NATO është prezente në Kosovë, kemi forcat e KFOR-it atje që janë atje për siguri dhe stabilitet për Kosovën dhe njerëzit që jetojnë aty. E zbatojmë mandatin tonë të dhënë nga Kombet e Bashkuara në mënyrë të paanshme, dhe NATO-ja ka rritur prezencën në Kosovë dhe kemi shtuar qindra ushtarë për shkak të destabilitetit, dhunës dhe tensioneve që i kemi parë në javët e fundit”, shtoi ai.
Në samit nuk pritet të diskutohet fare për Kosovën, pavarësisht rritjes së tensioneve në veriun e vendit të banuar me shumicë serbe.
Trazirat e fundit në këtë pjesë të vendit kanë çuar në sulme të protestuesve serbë kundër ushtarëve të misionit të NATO-s në Kosovë – KFOR, por, megjithatë, Kosova është jashtë agjendës zyrtare të diskutimeve.
