Një incident ndodhur sot në Skenderaj gjatë vizitës së kryeministrit në detyrë, Albin Kurti, i cili kishte shkuar për të marrë pjesë në përurimin e një çerdheje në këtë komunë.
Sipas informacioneve të para, gjatë lëvizjes së eskortës së Kurtit, automjetet e saj janë qëlluar me vezë nga persona ende të paidentifikuar.
Kjo tashmë është konfirmuar edhe nga dega e LVV-së në Skenderaj dhe po ashtu janë publikuar pamje, ndërsa akoma s’dihet kush qëndron prapa këtij veprimi.
Ndërkohë, kryetari i Degës së Vetëvendosjes në Skenderaj, Hysni Mehani, ka thënë se sulmi i sotëm me vezë ndaj Kurtit në Skenderaj , “është dëshmi që Sami Lushtakut ju ka lagë baruti”.
“Ky sulm është dëshmi e mendësisë primitive që udhëheq me PDK në Skënderaj e fatkeqësisht krejt PDK-në. Ata që kanë gjuajtur me kallash kur fituan kur një pasardhësi të Jasharajve, nuk na bëjnë përshtypje kur gjuajnë me vezë. Barutin e kanë lagur. Ide për zhvillimin e qytetit nuk kanë. Pronat për të vjedhur ju kanë harxhuar, po duan të fitojnë vëmendje me skandale”, shkroi Mehani.
