Kryetari i Kuvendit të Kosovës, Dimal Basha, edhe zyrtarisht ka thirrur mbledhjen e Kryesisë së Kuvendit për të hënën e 1 shtatorit, shkruan Gazeta Enigma”.
Kuvendi i Kosovës përmes një emaili ka njoftuar se mbledhja do të mbahet nga ora 13:00, ndërsa pika e vetme e rendit të ditës në këtë mbledhje është takim konsultativ.
PDK dhe LDK i thanë “JO” Bashës
Shefja e Grupit Parlamentar të LDK-së, Hykmete Bajrami, në një përgjigje për Gazetën “Enigma” tha se partia e saj nuk merr pjesë në këtë takim pasi Kryesia ende nuk e marrë detyrën.
“Siç e kemi thënë edhe dje LDK nuk shkon nesër në takim të Kryesisë sepse ne konsiderojmë se seanca konstituive u mbyll në kundërshtim me Rregulloren e Kuvendit dhe Kuvendi nuk është i konstituar, rrjedhimisht Kryesia ende s’ka marrë detyrën”, deklaroi Bajrami për “Enigmën”.
Ndërsa Partia Demokratike e Kosovës përmes një komunikate për media ka njoftuar se nuk do të marrin pjesë në mbledhjen e thirrur nga kryeparlamentari Dimal Basha.
Përmes kësaj komunikate nga PDK thanë se kjo mbledhje është e pakuptimtë, pasi Kuvendi nuk është konstituuar ende.
“Kryetari i Kuvendit shpalli të përfunduar konstituimin e Kuvendit të Republikës së Kosovës, pa u zbatuar në tërësi Neni 67 i Kushtetutës së Kosovës. Për Partinë Demokratike të Kosovës, Kuvendi ende nuk është i konstituuar, sepse nuk është zgjedhur Kryesia e tij në përbërjen e plotë kushtetuese”, thuhet në reagimin e PDK-së.
Tutje ata kanë theksuar se “në këto rrethana, PDK e konsideron të pakuptimtë ftesën për takim të Kryesisë së Kuvendit që nuk është konstituuar dhe nuk merr pjesë në takime të tilla, të cilat i shërbejnë vetëm agjendave partiake e jo interesit të shtetit”.
“PDK vlerëson se zvarritjet e qëllimshme në procesin e themelimit të institucioneve shtetërore, të shkaktuara nga partia e parë, janë skajshmërisht të rrezikshme për Republikën e Kosovës”.
Sipas reagimit të Partisë Demokratike të Kosovës kjo qasje e LVV po e shtyn Kosovën drejt një krize të re institucionale.
“Edhe pse nuk kishte detyrim kushtetues apo politik, Partia Demokratike e Kosovës mori mbi vete përgjegjësinë institucionale duke votuar për Kryetarin e Kuvendit, me qëllim të vetëm zhbllokimin e institucionit më të lartë përfaqësues të qytetarëve”, thanë nga PDK.
Tutje ata kanë theksuar se “ veprimet e mëtejshme dhe skemat populiste të Vetëvendosjes po e dëshmojnë qartë frikën e saj nga hyrja e ligjshme në afatet kushtetuese për të provuar krijimin e qeverisë së re. Kjo qasje, me fajin e tyre, po e shtyn Kosovën drejt një krize të re institucionale, pasojat e së cilës do t’i bartin shteti dhe qytetarët tanë”. /Gazeta Enigma/
