Irani ka bërë të ditur të shtunën se është në pritje të përgjigjes zyrtare të Shteteve të Bashkuara për propozimin e tij për rihapjen e Ngushticës së Hormuzit dhe ndaljen e luftimeve në rajon brenda shtatë ditësh.
Ndërkohë, një medium amerikan raporton se presidenti Donald Trump nuk e ka pranuar ofertën dhe se po pret zgjedhjet afatmesme amerikane që të rinis bombardimet.
Sipas zyrtarëve iranianë, propozimi është paraqitur gjatë punimeve të Asamblesë së Përgjithshme të Kombeve të Bashkuara në New York dhe i është përcjellë palës amerikane përmes Katarit.
Ministri i Jashtëm iranian, Abbas Araqchi, tha se një marrëveshje do të niste një afat shtatëditor për rihapjen e ngushticës dhe ndaljen e konflikteve në rajon.
“Nëse nga pala amerikane ka seriozitet për arritjen e një marrëveshjeje dhe rihapjen e Ngushticës së Hormuzit, gjithçka tashmë është gati”, tha Araqchi.
Ai deklaroi se, nëse SHBA-ja e pranon propozimin, palët ndërluftuese mund të nisin bisedime më të gjera për çështje të dakordësuara nga të dyja palët. Këto bisedime mund të përfshijnë edhe programin bërthamor të Iranit.
Megjithatë, një zyrtar i lartë iranian i tha Reuters se Teherani nuk do të tregojë fleksibilitet sa i përket pasurimit të uraniumit dhe as dërgimit të uraniumit të pasuruar në nivele të larta jashtë vendit.
Sipas planit iranian, luftimet do të ndaleshin në të gjitha frontet, përfshirë Libanin. Në këmbim, SHBA-ja do të duhej të hiqte bllokadën ndaj porteve iraniane, të lironte fondet iraniane të ngrira dhe të hiqte sanksionet ndaj naftës.
Wall Street Journal, ndërkohë, raportoi se Trump e ka refuzuar ofertën dhe se privatisht ka shprehur dyshime nëse Irani do t’i përmbushte kërkesat e tij. Reuters tha se nuk ka mundur ta konfirmojë menjëherë këtë raport.
Konflikti, i cili nisi më 28 shkurt pas sulmeve amerikane dhe izraelite, ka vazhduar të ketë pasoja edhe në vendet e tjera të rajonit.
Irani ka diskutuar me Arabinë Saudite për rrugët e sigurta të lundrimit në Ngushticën e Hormuzit, ndërsa Huthët jemenas kanë vazhduar sulmet ndaj objektivave saudite.
Ndërkohë, Arabia Saudite, Pakistani dhe Turqia kanë intensifikuar konsultimet për bashkëpunimin në fushën e sigurisë, ndërsa UNICEF-i ka paralajmëruar se dhuna në Jemen po shkakton një krizë të re humanitare dhe rritje të kequshqyerjes akute te fëmijët.
