Shumë persona janë intervistuar në lidhje me vrasjen e rreshterit policor, Muhamed Lika mbrëmë në Kaçanik.
Kështu ka njoftuar kryeprokurori i Prokurorisë së Ferizajt, Burim Çerkini përmes një konference për media.
Ai tha se që nga mbrëmë, hetuesit policor janë në terren për të identifikuar dhe vlerësuar çdo informatë, provë apo dëshmi që do të na drejtojë në pistat e mundshme të hetimit.
“Jemi duke marr të gjitha veprimet hetimore për të zbuluar arsyen dhe motivin që ka çuar deri në kryerjen e kësaj vrasjeje të rëndë. Që nga mbrëmë, hetuesit policor janë në terren për të identifikuar dhe vlerësuar çdo informatë që do na çojë në pistat e mundshme të hetimit. Gjatë punës hetimore, mbrëmë por edhe sot, nga policia e Kosovës janë ndërmarr shumë veprime hetimore, janë intervistuar shumë persona, dëshmitarë, persona që kanë rastisur në vendin e ngjarjes dhe persona që mund të japin informacione dhe që do na shpien në zbardhjen e kësaj çështjeje”, tha ai.
Çerkini tha se Prokuroria Themelore në Ferizaj vlerëson lart angazhimin e rreshterit Lika në kryerjen e detyrave shtetërore dhe u shprehi ngushëllime familjarëve të tij.
