Zyra e Prokurorit të Specializuar (ZPS) ka kërkuar nga gjyqtari i procedurës paraprake që të refuzojë kërkesat për lirim nga paraburgimi, të parashtruara nga mbrojtësit e Kadri Veselit, Rexhep Selimit dhe Jakup Krasniqit.
Ata kanë konsideruar se vazhdimi i paraburgimit për tre të lartpërmendurit vazhdon të jetë i nevojshëm, raporton “Betimi për Drejtësi”.
Sipas ZPS-së, edhe paneli i Apelit ka konfirmuar se rreziqet nga neni 41 (6) (b) vazhdojnë të ekzistojnë.
Tutje, thuhet se në vendimin e fundit për rishikim të paraburgimit, paneli i Apelit ka konfirmuar gjetjet e gjyqtarit paraprak për ekzistimin e dyshimit të bazuar se të akuzuarit kanë kryer krime brenda juridiksionit të Gjykatës Speciale dhe arsyet e artikulueshme për të besuar se të njëjtit do të pengojnë mbarëvajtjen e procedurës penale apo do të përsërisin apo tentojnë të përsërisin vepra penale.
Shkresën e plotë të ZPS-së mund ta gjeni këtu: https://repository.scp-ks.org/LW/Published/Filing/0b1ec6e980a54713/Public%20redacted%20version%20of%20Prosecution%20consolidated%20response%20to%20October%202021%20Defence%20Submissions%20on%20Detention%20Review.pdf
Ndryshe, më 9 nëntor, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë.
Njëjtë është deklaruar edhe Veseli në paraqitjen e tij me 10 nëntor, sikurse edhe Selimi me 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.
Sipas akuzës së ngritur, së paku midis marsit 1998 deri në shtator 1999, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të ndërmarrjes kriminale të përbashkët kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.
“Ndër këta kundërshtarë përfshiheshin persona që ishin, ose që konsideroheshin se kishin qenë: (a) bashkëpunëtorë ose të lidhur me forca, zyrtarë ose institucione shtetërore të RFJ-së, ose që (b) ndryshe nuk mbështetnin qëllimet ose metodat e UÇK-së dhe më vonë të QPK-së, ndër të cilët persona të lidhur me LDK-në dhe serbë, romë dhe persona të kombësive të tjera (bashkërisht, ‘kundërshtarët’). Ky qëllim i përbashkët përfshinte krimet e përndjekjes, burgosjes, arrestimit dhe ndalimit arbitrar ose të paligjshëm, akte të tjera çnjerëzore, trajtimin mizor, torturën, vrasjen dhe zhdukjen me forcë të personave”, thuhet në aktakuzë.
Tutje, në aktakuzë përmenden edhe Azem Syla, Lahi Brahimaj, Fatmir Limaj, Sylejman Selimi, Rrustem Mustafa, Shukri Buja, Latif Gashi dhe Sabit Geci. /Gazeta Enigma.
